| |
"Segundo
se informou oportunamente dende as páxinas deste xornal, o pasado
día 28 de xullo Mi Casa, a residencia de anciáns -ou, como hoxe,
eufemísticamente, se prefire dicir, da terceira idade- de Canido,
estivo de festa. Xa por terceiro ano consecutivo residentes e
familiares tivemos a honra de celebrar xuntos "o día das familias",
unha sinxela pero entrañable e simpática mestura do relixioso
co´lúdico e -non podía faltar-, tamén, de paso, co gastronómico.
Na
parte relixiosa tivemos o placer de participar -eu mesmo como
lector- nunha emotiva Eucaristía, presidida nada menos que polo noso
bispo da diócese, monseñor Sánchez Monge, con quen celebraron os
reverendos -bos e queridos amigos meus- Antonio Costoya e Ramón
Otero; tampouco debo silenciar a inapreciable contribución de Sor
Matilde ó acto coa súa persistente incitación ó canto colectivo (non
esquezamos que quen canta reza dúas veces) e, como broche de ouro,
cos sentidos versos que nos leu ó remate da misa.
Logo
veu o tirón de orellas: o vicepresidente de "Mensajeros de la Paz"
-asociación da que depende esta residencia-, D. Antonio Rodríguez
Pena, primeiro, e despois o propio señor bispo, recordáronnos ós que
temos algún familiar en Mi Casa a obriga que sobre nós pesa de
visitar e acompañar o máis posible ós nosos maiores, ós que,
obviamente, non
levamos alí para os "aparcar" e inmediatamente esquecernos do
asunto, senón, moi pola contra, para os ter máis presentes que nunca.
Eles agora necesítannos, se cadra, máis que antes, porque -estou
completamente de acordo- as necesidades vitais dun ser humano non se
reducen ó mero coidado material, que en Mi Casa teñen de sobra
asegurado...[...]" |
