| |
|
A tódolos Párrocos
Benquerido compañeiro sacerdote:
Como é de todos coñecido, xa polas novas que nos chegan como pola propia
experiencia pastoral, cada día achéganse ás nosas comunidades inmigrantes de
diversa procedencia que veñen ao noso país, como antes fomos nós a outros
países do estranxeiro, a gañar e conseguir unha calidade de vida máis digna
que a do seu lugar de orixe.
Dixeron os nosos bispos na última asemblea da Conferencia Episcopal, con
motivo da próxima publicación do documento "A Igrexa en España e a Pastoral
de Migracións", que "a presenza dos inmigrantes ofrece á Igrexa unha
oportunidade e ten que ser vista como unha graza que lle axuda á mesma
Igrexa a facer realidade esa vocación de ser signo, factor e modelo de
catolicidad". Engadindo que "para a Igrexa, o emigrante, independentemente
da súa situación - legal, económica, laboral - na que se atope, é unha
persoa coa mesma dignidade e dereitos fundamentais que os demais, é un fillo
de Deus, creado, redimido e querido por Él, é a presenza de Xesucristo, que
se identifica con el e que demanda de nós o mesmo trato e o mesmo servizo
que lle debemos a Él".
Dito isto, co que non soamente estamos de acordo senón que ademais supón
para todos un reto pastoral que non podemos eludir, hai que engadir por
outra banda que se está
dando nalgúns inmigrantes o intento de legalizar a súa situación a través da
formalización dun matrimonio canónico con persoas españolas que en máis dun
caso apenas se coñecen, presentando documentación (lugar de residencia,
estado, condición relixiosa, etc.), se non falsificada, si non
suficientemente contrastada.
Polo tanto, ante esta nova situación, hai que actuar con prudencia. Calquera
dúbida ou sospeita nese punto débese consultar con esta Vigairía.
Desexándoche a ti e á túa comunidade ou comunidades unha proveitosa
preparación do Nadal neste tempo de Advento, recibe un agarimoso e fraternal
saúdo.
Antonio Rodríguez Basanta, Vigairo Xeral da Diocese de Mondoñedo-Ferrol
|