Despedida de Lourdes, unha traballadora moi querida no Seminario de Mondoñedo

O falecemento produciuse na mañanciña do día de Noiteboa

O bispo diocesano presidirá unha eucaristía no seu recordo o vindeiro 11 de xaneiro

"As palabras non chegan. Para moitos viña a ser como unha boa compañeira, unha irmá e mesmo unha nai"

"Os que coñecimos e tratamos Lourdes, comezando pola súa familia, sabemos da súa bondade, delicadeza e espírito de servicio. Sempre a vimos como unha muller atenta, traballadora e responsable. Para moitos viña a ser como unha boa compañeira, unha irmá e mesmo unha nai. E para a súa familia evidentemente ese pilar fundamental e imprescindible en que apoiarse".

"Desde o Seminario de Mondoñedo, que para Lourdes era coma a súa segunda casa, sentimos fondamente esta perda. Desde o bispo, quen non puido facerse presente pero que manifestou a súa condolencia á familia; o reitor do Seminario e reitores e formadores anteriores, seminaristas e exalumnos; ata os sacerdotes residentes e os non residentes que acudimos ocasionalmente ó noso Seminario, para quen Lourdes viña a ser coma unha nai ou unha irmá, e por suposto as compañeiras e compañeiros de traballo, etc. Tantas persoas que de verdade a queriamos e sabíamos da súa valía".

"Queremos estar moi cerca do seu esposo e do seu fillo, da súa nai e irmáns, e de toda a súa familia. Non é nada fácil vivir este momentos. As palabras non chegan. Queremos amosar o noso pesar coa cercanía cariñosa, o silencio respectuoso e a oración confiada por ela e polos seus".

O vindeiro día 11 de xaneiro, venres, ás 17 horas, na capela grande do Seminario, celebrarase un funeral por Lourdes presidido polo noso bispo Luis Ángel.

Extracto da homilía pronunciada polo vicario xeral esta tarde durante o funeral na parroquia de San Vicenzo de Mondoñedo