Seguro que moitos de nós recordamos de nenos a Xornada da “Santa Infancia”, hoxe chamada “Infancia Misioneira”. Viña a ser o resultado dunha mentalización ou toma de conciencia misioneira de dar a coñecer a nosa fe en Xesús Cristo a outros mundos e culturas lonxanas.

Daquela abríasenos dun horizonte planetario que, dentro da nosa capacidade infantil, tratábamos de remediar males e suplir carencias dos países pobres, e tamén de axudar aos misioneiros, economicamente e coa oración, na súa aventura de anunciar o evanxeo aos “infieis”.

Aínda que os tempos cambiaron, non precisamente para ben en moitos destes países, esta chamada segue tendo vixencia. Primeiro porque educar a un neno para que sexa máis solidario e menos egocéntrico, para que pense tamén nos demais e non só en si mesmo e nas súas cousas, e mesmo comparta algo do que ten ou se lle dá, sobre todo cos máis pobres aínda que vivan lonxe, sempre humaniza e ennoblece á persoa.

E, por outra banda, se a fe que transmitimos e na que educamos aos nenos e mozos na Igrexa  - a través da catequese e da celebración litúrxica – , nos colexios e nas familias é unha “boa nova”, é dicir, evanxeo auténtico, esa fe irá dando necesariamente os seus froitos, non sen dificultades e co apoio dos adultos, ata tal punto que sexa dalgún xeito testemuñada e anunciada polo mesmos nenos e mozos.

A fin de contas é o mesmo Espírito do Señor quen fala, impulsa e quita os medos para mostrase como crente e dar testemuño da fe, neste caso a través dos nenos que polo bautismo están habitados por El.

De aí que o lema da Xornada deste ano teña sentido: “cos nenos de América... falamos de Xesús”.

Antonio Rodríguez Basanta es Vicario General de Mondoñedo-Ferrol